លេច​ចេញ​រូបរាង Laptop របស់ Xiaomi មើល​ទៅ​ស្រដៀង​នឹង MacBook Pro

ទីផ្សារកុំព្យូទ័រយួរដៃអាចនឹង​មាន​ការ​ប្រែ​ប្រួល​ខ្លាំង នៅ​ពេល Xiaomi ជាក្រុម​ហ៊ុន​ចិនសម្រេច​ចិត្តផលិត​កុំព្យូទ័រ​យួរដៃជា​លើក​ដំបូង​របស់​ខ្លួន ដូចទៅ​នឹងអ្វីដែ​ល​យើង​បាន​ដឹង​រួច​ទៅហើយថា រាល់ផលិតផល Xiaomi គឺមានតម្លៃធូរថ្លៃ ហេតុដូច្នេះហើយតើ Laptop វិញតើនឹងធូរថ្លៃដល់កម្រិតណាទៅ? តើអ្នក​រំពឹង​ទុក​អ្វីខ្លះពីវា? ជាកុំព្យូទ័រយួរដៃសម្រាប់ប្រើប្រាស់ធម្មតា, ជាកុំព្យូទ័រពពួក Workstation ឬជាកុំព្យូទ័រ​សម្រាប់​យកមកលេងហ្គេម? ចម្លើយមាននៅទីនេះ! ព្រោះយើងទើបនឹងទទួលបាននូវពត៌មានជុំវិញ Laptop ជាលើកដំបូងរបស់ Xiaomi ដូចរូបខាងក្រោយនេះ ដែលបានបែកធ្លាយ ហើយបង្ហាញឲ្យ​យើង​ឃើញ​យ៉ាងច្បាស់ថា វាមានរូបរាងស្រដៀងទៅនឹង MacBook Pro របស់ Apple ខ្លាំងណាស់។

យើងអាចនិយាយបានថារូបរាងទាំងស្រុងរបស់វាគឺដូចទៅនឹង MacBook Pro ដល់ទៅ 95% ទៅ​ហើយ តួខ្លួនស្រោបឡើងពីលោហៈធាតុមានគុណភាពខ្ពស់, កម្រាស់ស្ដើងប្រហាក់ប្រហែលគ្នា, ឡូហ្គូ​បញ្ចេញពន្លឺពណ៌សនៅផ្នែកខាងលើ ដោយខុសមួយជារូបផ្លែប៉ោម និងមួយនេះជារូបអក្សរ Mi ដំណាង​វិញ រីឯទីតាំងចាប់បើកអេក្រង់ឡើងលើក៏ស្រៀងគ្នាថែមទៀត។ មើលទៅ Xiaomi ប្រហែលជា​ចង់ធ្វើ​ជា​ដៃគូ​ប្រកួតប្រជែងជាមួយ Apple ខ្លាំងណាស់ហើយមើលទៅ ព្រោះនៅស្រុកចិនឯណោះគេបានហៅ Xiaomi ថាជា Apple ទី 2 ម្យ៉ាងវិញទៀតនិយាយដល់បញ្ហាទីផ្សារវិញដូចលោកបានអ្នកដឹងហើយថា Laptop របស់ Apple ស៊េរីថ្មីគឺមានតម្លៃ 2000$ ជាង ហើយធុនមធ្យមមាន CPU ប្រភេទ Core i5 Ram ត្រឹម 4-8GB និងអង្គផ្ទុកទិន្នន័យ 128-256GB ក៏ 1000$ ក្រាស់ដែរ ហេតុនេះវាគឺជាតម្លៃមួយថ្លៃ ដែលអ្នកមិនសូវជាមានថវិកា​ មិនអាចទិញវាយកមកប្រើប្រាស់បាន តែអាចប្រហែលជានឹងអាច​ក្លាយ​ជាម្ចាស់​របស់ Laptop Mi ពី Xiaomi បាន ជាមួយរូបរាងស្រស់ស្អាត ប្រណិត ថែមទាំងមានតម្លៃធូរ​ថ្លៃ​ទៀតផង បើនៅស្រុកខ្មែរយើងអាចនឹងមានភាពងាយស្រួលទិញយកមកប្រើប្រាស់ថែមទៀត។

បើទោះបីជារូបភាពទី 1 ខាងលើត្រូវបានបែកធ្លាយក៏ពិតមែន ក៏យើងនៅមិនទាន់ហ៊ាន​ថាវាជារូបរាងពិត​របស់​កុំព្យូទ័រ​យួរ​ដៃរបស់ Xiaomi ផងដែរ វាអាចជាការបោកប្រាក់តាមរយៈ Photoshop ក៏ថាបាន តែ​អ្វី​ដែល​យើងដឹងខ្លះៗអំពីវានោះគឺ កុំព្យូទ័រនោះនឹងដំណើរការដោយប្រព័ន្ធប្រតិបត្តិការ Windows 10 (64-bit) ត្រៀមចេញនៅក្បែរចុងឆ្នាំ 2016 នេះតែម្ដង ដោយវាមាន 2 ទំហំសម្រាប់ជ្រើសរើសគឺ 12.5 អ៊ីញ និងមួយទៀតនៅស្រពិចស្រពិលនៅឡើយ តែអាចជាទំហំ 15.4 អ៊ីញច្រើនជាង ចំនែក​កម្លាំង​ម៉ាស៊ីន, រយៈពេលថ្មប្រើប្រាស់ និងតម្លៃ យើងនឹងរង់ចាំមើលការប្រកាសចេញជាផ្លូវការទាំងអស់គ្នា។